ორაგულის მრგვალი სტეიკი ფორთოხლის სოუსით 2

თუ სადღესასწაულო თევზის კერძს ეძებთ, გირჩევთ ყურადღება მიაქციოთ ჩვენს ორაგულის მრგვალ სტეიკს ფორთოხლის სოუსით.

პირველ რიგში, ის ძალიან ეფექტური და ლამაზი გამოდის, მასპინძლისთვის კი სტუმრებისგან ქება ყოველთვის სასიამოვნოა. მეორეც, ასეთი სტეიკის მომზადება საკმაოდ მარტივი და სწრაფია, რაც მნიშვნელოვანი არგუმენტია წინასადღესასწაულო ფაციფაცში. და მესამე — არაჩვეულებრივად გემრიელი ფორთოხლის სოუსი, რომელიც თქვენც და თქვენს სტუმრებსაც ძალიან მოგეწონებათ.

ორაგულისებრთა ოჯახში ბევრი სხვადასხვა თევზია ნებისმიერი გემოვნებისა და ბიუჯეტისთვის. ამ რეცეპტში მთავარი — იდეაა, მისი განხორციელება კი შესაძლებელია როგორც ძვირადღირებული ატლანტიკური ორაგულით, ისე კალმახით, კეტათი ან თუნდაც კაპარჭანათი. ბოლო ორის შემთხვევაში მხოლოდ მომზადების დრო უნდა შეამციროთ, რადგან ისინი ნაკლებად ცხიმიანი თევზებია და მნიშვნელოვანია, რომ არ გამოაშროთ.

თუ გაყინული ორაგულის სტეიკები შეიძინეთ, წინასწარ გადაიტანეთ ისინი მაცივარში სათუთი ლღობისთვის. თანდათანობითი ლღობისას ისინი შეინარჩუნებენ წვნიანობას და არაფრით განსხვავდებიან ახალი თევზისგან.

ინგრედიენტები

• ორაგული — 4 სტეიკი (თითო 250 გ-იანი)
• ფორთოხალი — 2 ცალი
• კარაქი — 100 გ
• ზეითუნის ზეთი — 5 სუფრის კოვზი
• როზმარინი — 5 ტოტი
• სოიოს სოუსი — 3 სუფრის კოვზი
• თაფლი — 1 სუფრის კოვზი
• შაქარი — 1 სუფრის კოვზი
• სიმინდის სახამებელი — 1 სუფრის კოვზი
• ჩილის ფანტელები — 1 ჩაის კოვზი
• წყალი — 120 მლ
• მარილი და ახლად დაფქული შავი პილპილი — გემოვნებით

დამზადება

1. ორაგულის სტეიკი შედგება სქელი ზურგის ნაწილისა და ორი თხელი მუცლის ნაწილისგან. იმისათვის, რომ სტეიკი თანაბრად შეიწვას და ლამაზად გამოიყურებოდეს, ის უნდა დაახვიოთ წრედ. ამისათვის, პატარა დანით ფრთხილად ამოჭერით და მოაცილეთ ხერხემლის ძვალი თითოეულ სტეიკს, ხოლო მუცლის ნაწილის შიდა მხრიდან ააჭერით თხელი აპკი.
2. დადეთ სტეიკი სამუშაო ზედაპირზე თქვენ წინ და ჩაჭერით (მაგრამ არ მოჭრათ!) კანი: დაიწყეთ მუცლის მხრიდან ნაჭრის შუა ნაწილამდე, დაახლოებით 3-4 სმ-ზე. კანი უნდა ჩაჭრათ მხოლოდ ცალ მხარეს, მუცლის მეორე ნაწილი კანით რჩება.
3. კანის გარეშე დარჩენილი ნაწილი შეკეცეთ სტეიკის შიგნით, ხოლო შემდეგ მასზე გადაახვიეთ მეორე ნაწილი — მიიღებთ წრეს. ახლა სტეიკს გარედან შემოავლეთ კანის თავისუფალი ნაჭერი და მჭიდროდ შეკარით სამზარეულოს ძაფით (შპაგატით).
4. გაახურეთ ღუმელი 200 °C-მდე. სტეიკები გაამშრალეთ ქაღალდის ხელსახოცით. ცეცხლგამძლე ფორმას წაუსვით ზეითუნის ზეთი და მასში სტეიკები ერთმანეთისგან მოცილებით ჩააწყვეთ.
5. გაჭერით 1 ფორთოხალი შუაზე. ერთი ნახევრიდან გამოწურეთ წვენი, მეორე ნახევარი კი დაჭერით 1 სმ სისქის ნახევარმთვარისებრ ნაჭრებად. ფორთოხლის წვენი შეურიეთ სოიოს სოუსსა და თაფლს, დაამატეთ ჩილის ფანტელები და ათქვიფეთ ხელის ზამბარით.
6. როზმარინის ტოტები ჩააწეთ ფორთოხლის მარინადში და წაუსვით სტეიკებს. თითოეულ სტეიკზე მოათავსეთ 1-2 ნაჭერი ფორთოხალი. როზმარინის ტოტები კი ფორმაში თევზის გარშემო გადაანაწილეთ. შედგით ღუმელის შუა ნაწილში და აცხვეთ 20 წუთი.
7. სანამ თევზი ცხვება, მოამზადეთ სოუსი. მეორე ფორთოხალს მოაცილეთ კანი. ბასრი დანით ამოჭერით რბილობის ნაჭრები (ლებნები) ისე, რომ თეთრი აპკები არ მოჰყვეს. ტაფაში გაადნეთ კარაქი და ჩააწყვეთ ფორთოხლის რბილობი. დაამატეთ შაქარი, ჩილის ფანტელები და როზმარინის პატარა ტოტი. შუშეთ საშუალო ცეცხლზე 3-4 წუთი, თან მუდმივად ურიეთ და რბილობი ნიჩბით დაჭყლიტეთ.
8. სახამებელი გახსენით ცივ წყალში. მიღებული ხსნარი დაასხით ტაფაში და ინტენსიურად აურიეთ. განაგრძეთ მორევა კიდევ 1 წუთი, სანამ სოუსი არ გასქელდება. თეფშების ცენტრში დაასხით 2-3 სუფრის კოვზი სოუსი, ზემოდან მოათავსეთ მზა სტეიკები და მაშინვე მიიტანეთ სუფრასთან.